Bharot ek bhou-dhormik ani bhou-bhaxik des. Puraton kalla thaun dor eka nagri modem xanti ani ekchar aslo. Punn jednam jednam songhorx zalo tednam mat xanti bigoddli ani gottbazi zali. Hie gottbazint sonksrutai ani bhavponn noxtt zalem. Dusman’kai uprasli. Yad urpa sarkem udahoronn zaun asa Bharotachi fallnni. Bharotak svotontrtai mellounk sogllea Bharotiyamni ekzhutt zaun loddo ubharlolo punn nimannea vellar kaim Muslim fuddariamni vegllea desachi magnni keli ani lakhamni Muslim bandhov sattli-pottli gheun pollon gele ani Pakistan nirmann zalo. Hench karonn tharlem Bharotachi Ghottona boroitanam, soglleam khatir tatunt favo tem sthan diunk. Bharot ho toso Hindu des punn hea desant ravtolea dor eka dhormikak aplea dhormprosarachi mekllik dovorli, goribank fuddem yeunk vatt toyar keli ani ostoriank ani magas vorgantlea lokak gineani zaunk arokxonn svikarlem.
“Arokxonn kiteak zai? Taka lagun somazant futt poddtta. Atam tori ami kosleach bhed-bhavan cholonant, ostoriank legit dadlea bhoxen vagoun sogllie koddem nokri melltta.” Ek somajik fuddari mhunntta. Taka azunui Bharotachie Ghottnnechim Art. 15 ani Art. 16 khobor nant. Avoi-bapaichie aspoticho vantto konn soddtta? Ani kiteak soddcho? Nam zalear boltoch tacho faido ghetolo hem vegllem sangonk zai? Brittix rajvottki astanam gorib lokak ani ostoriank hinnsavpachea prokornnantlean hi arokxonnachi sonkolpona zolmak aili ani tem svikarlem mhonn konnem konnacher upkar kelo nam. Kiteak raj kortat te bhuim-putr? Duddu ani bhanddvolxai raj korta, henvui somajik fuddariamni zanna zaunk zai.
“Dr. B. R. Ambedkar, dalit somazantlo Bharoti fuddari ani pexan vokil aslolean Bharoti Ghottnna Somitichem tachem odheokxpod orthabhorit tharlam. Soglleanchem sukh-sukh somzon gheun Ghottonna Sobhechea vangddianchem mhunn’nnem borie toren hatall’llem, he khatir taka xabaski.” Oslim vidhanam rajki machie velean zatat kiteak tannem kelolo vaur desachie porjek faidexir tharla. Tea kalla vele fuddari-i titlech udar ani kalljidar asle. Pandit Nehrun Dr. Ambedkarak hem pod dilolem, hacho orth tea lokak goribachi chinta asli ani tanchem dukhnnem tankam khobor aslem. Aichea fuddariank hi tank asa kai? Goribanchea desant goribank nodre mukhar dovrun kitem ghoddtta kai?
Bailank arokxonn dilem mhonn konnem dukhi zaunchem nhoi, adivasi ani her magas vorgank arokxonn dilem mhonn konnench ragar zaunchem nhoi, orthik nodren dublleank arokxonn dilem mhonn kaim nozo. Ami eka-mekak hat diun cholonk xikom-ia. Amchie nodrentlo vegllochar poisaum-ia ani kallzantlo mog vaddoum-ia. Sogllim sangata jiyeum-ia ani dusreankui jiyeunk dium-ia.