Chokchokta tem bhangar nasta oxem mhunnttat tem fott nhoi. Pitull legit bhangra sarkem chokchokta. Tem bhangra sarkem dista. Punn tem bhangar nasta. Ami kaim vella pitullak bhangar somzotat ani fostat.
Eka ganvant bapui ani put ravtalo. Put sat-atth vorsancho astolo. Ek dis bapui aplea putak gheun bazarant gelolo. Modench eka mon’xa koddem bott dakhoun tannem mhunnlem, “Babu, to polle chor. Taka pulisamni beddio ghaliat. Tannem kosli tori chori kelia astoli. Tache donui vottamni chear pulis asle. To pollon vecho nhoi mhonnun pulisank oso bondobost korcho poddtta.” Bapaichim utram niyallit putan umollxiken tea mon’xak pollelo.Te ghora aile.
Oxech kaim dis gele. Aniek dis te dogui bazarant vetanam bapaichem lokx eka mon’xa koddem vedhun putan mhunnlem, “Baba, to polle chor. Tache fattlean-fuddlean dha-bara pulis asat. Baba, ho chor samko ott’ttol chor dista nhoi?”
“Xuuuu! Lhovu uloi. To chor nhoi. To montri. Tachie rakhnne khatir toso pulis bondobost dovorcho poddtta.”
“Montri zalear cholon-so?”
“Babu, toxem asta tem. Apunn lokachim sogllim kamam kortam hem dakhovpa khatir montriak oxem korchem poddtta.”
“Tache fattlean-fuddlean itle pulis kiteak tor?”
“Tunvem fattlea vellar pollelolem toxench chitr hem. Punn matxe vegllem. Fattlea vellar apnnem dhorlolo to chor aplea hatantlean pollon vecho nhoi mhonnun pulisamni taka beddio ghalolio, hanga montriacher konnem hol’lo korcho nhoi mhonnun pulis tachi rakhonn kortat. Babu, dista toxem nasta hem motint dhor.” Bapain putak mhunnlem ani putak tem pottlem.
