Soglleank amkam hie kanniechi khobor astoli – Eka mon’xa koddem ek kombi asli ani ti bhangarachim tantiam ghaltali. Ti kombi dor disa tea mon’xak ek tantem ditali ani tem tantem vikun to monis jiyetalo. Punn tea mon’xachem mon tharonam zalem. Taka chodd poixe korpachi ast zali.
Ek dis tannem monant mhunnlem, “Hanv tie kombiek jivexim martolom ani ekach vellar sogllim tantiam mhaka mellttolim.” Tannem kombiek marli punn tachem noxib futtkem zalem ani taka ek pasun tantem mellonk nam. Taka dispott’ttim mellttalem tem pasun tantem nam zalem. Hem zaunk pavlem fokot tachie axek ani nennarponnak lagun.
If you enjoyed reading this article, you can help support our journalism by adding OHeraldo as a preferred source.
Axea amchea jivitant nisonntton korta. Ek boroinnar oxem mhunnttallo, ‘axecho gunn aslolea mon’xak sonvsar pasun mellot zalear tachi axea kednanch bhagchi nam.’ Zor ami amchem mon axe vinnem dovorlem zalear, amcho dorzo eka raza von vhodd zatolo ani ami sodanch xantin jiyetole.
Amkam girestkayechi goroz asa ani tiche vinnem dispott’ttem jivit jiyeunk chodd aughodd zata. Punn girestkai promanikponnan ani sarkea monan ektthaunk zai. Famad vidhvan Albert Einstein oxem mhunttallo, “Sonvsarantli soglli girestkai mon’xak kednanch dhadosponn diunk xokonam, fokot somadhanacho sobhav khori xanti diunk xokta.” Hacho orth oso nhoi ki ami komounchem nhoi, punn ami kurdde zaun undrachie dhavnnie bhoxen dhanvonk favo nam ani magir amcho nas zata. Amchem jivit eka sallka (lotus) bhoxen asonk zai. Sallok eka mhellea konddant ason pasun tem voir sorta ani apnnak ghann chikttonk dinam. Poixeamni ami sukham (comforts) viktim gheunk zatat punn monachi xanti vikti gheunk zainam.
Axea amchea ontoskornnacher saulli ghalta ani haka lagun ami sarke nirnnoi gheunche boldek, ami bhailea sonvsarachea chokchokponnache (glamour and glitter) mogi zatat. Ghoddye amkam fokot thoddo vell dhadosponn melltta punn amchea otmeachem nisonntton zata.
Zaite zonn chint’tat ki fokot gireskai aslearuch amkam khuxalkai melltta. Taka zaite ixtt astat ani to zaitem viktem gheunk xokta punn to purnn khuxal asa oxem somzonk zainam. Shakespeare mhunnttalo, “Mhozo mukutt mhojea kallzant asa, mhojie tokliek nhoi. Mhozo mukutt zaun asa mhojem somadhan.”
Khorem somadhan ani xanti jivitant mellttoli zalear gorjek favo titli girestkai aschi ani borea monan ticho aplea ani dusreachie sevent upiog korcho.
