Zaite pauttim mhojea monant oslim chintnam yetat, Sonvsarant itlim zhogddim kiteak zatat kai? Devan ho sonvsar rochlo ani te uprant hea sonvsarachi zotnai korunk mon’xak rochlo. Mon’xak Devan mogan rochlo dekhun to Tachem mogachem hatiar zaunk zai aslem. Punn toxem ghoddlem nam. Kitle bhed-bhav amche modem? Zaum amchie bhaxek lagun, zaum amchie sonskrutayek lagun, zaum amchie girestkayek lagun, zaum amchie zatik ani katik lagun. Sompche nant sangon te bhed-bhav.
Ami social media-chea kallant asanv jednam amkam itlea sompork sadhonancho upiog korunk melltta ki amcheamni ek novi orthabhorit famil ghoddoun haddunk zata. Ek famil ji bhed-bhav nhoi punn eka-meka sangata choltoli famil. Zoxe bhoxen amche Pap Saib Francis sogllea sonvsarak ekcharachi yatra korunk apoita. Hea sompork sadhonamni amkam ek novi bhas ghoddun dilia ani ti bhas mhunnlear mogachi bhas. Hi mogachi bhas amkam soglleank eka paunddear haddun dovorta. Amchi bhas ji gorvan ghoddye ami uloitanv ani khub mhotvachi mhonn somzotanv, tiche von xrextth mogachi bhas. Itlench nhoi him sompork sadhonam amkam zaiti mahiti ditat, zaum dusrea-dusrea ganvchie sonskruti voir vo ganvchea lokachea jivita voir. Hi mahiti gheun ami amchem jivit urbebhorit ani orthabhorit korunk goroz.
If you enjoyed reading this article, you can help support our journalism by adding OHeraldo as a preferred source.
Itli progoti zaun legit amchim monam azun pasun bavlolim asat. Pap Saib Francisan amkam mhunnlolem asa ‘internet’ zaun asa amkam ek Devachem vhodd dennem. Hea denneacho ami boro upiog korunk zai. Hie progoticho upiog korun ami amchem jivit yoxosvi korunk paulam marunk zai. Zaite pauttim ami internet-acho durupiog kortanv. Hea internet-acheruch ami amchi podvi dakhoitanv, eka-mekachem nanv ibaddttanv, eka-mekak dhomki ditanv, eka-mekacher add uloitanv, eka-mekak respet ani man dinanv. Aiz ami chintunk gorjechem, hea sonvsarant hanv kiteak asam kai? Hanv ek mogachem foll koxem hea sonvsarant ailam. Dekhun hea sonvsarant zata tie progoticho hanv upiog korun mhojem jivit ani mhojea peleachem jivit orthabhorit, surokxit, ani fultem korunk mhoje proyotn zatole. Ghoddye tednam him zhogddim zhuzam ani bhed-bhav ani oteachear hea sonvsarantle somptole. Hanvem proyotn korunk nichev kela, tumchei zaum-di.
